Azərbaycan Cənubi Qafqazın Enerji Təminatçısı Kimi Strateji Mövqeyini Möhkəmləndirir

20 yanvar 2026-cı il tarixində Davosda keçirilən Dünya İqtisadi Forumu çərçivəsində Azərbaycan Respublikasının Prezidenti İlham Əliyevin “Euronews” televiziya kanalına verdiyi müsahibə ölkəmizin regional və qlobal enerji siyasətində tutduğu mühüm mövqeni bir daha nümayiş etdirdi. Dövlət başçısı müsahibəsində vurğuladı ki, Azərbaycan Cənubi Qafqaz regionunda enerji ehtiyatlarına malik olan və bu resursları digər ölkələrə ixrac edən yeganə dövlətdir.
Prezident İlham Əliyevin qeyd etdiyi kimi, Azərbaycan zəngin neft və qaz ehtiyatlarına, müasir enerji infrastrukturuna və etibarlı ixrac marşrutlarına malik olmaqla regionun enerji təhlükəsizliyində həlledici rol oynayır. Uzun illərdir formalaşdırılan strateji enerji siyasəti nəticəsində ölkəmiz yalnız daxili tələbatını tam ödəməklə kifayətlənmir, eyni zamanda bir sıra dövlətlərin enerji təminatında əsas tərəfdaş qismində çıxış edir.
Dövlət başçısının müsahibəsində xüsusi vurğuladığı məqamlardan biri Azərbaycanın neft və təbii qaz ixracının geniş coğrafiyanı əhatə etməsidir. Bu gün Azərbaycan enerji resurslarını regional ölkələrə, eləcə də Avropa bazarlarına etibarlı şəkildə çatdırır. Məhz bu amil ölkəmizi Cənubi Qafqazda enerji ixracçısı kimi alternativsiz mövqeyə yüksəldib.
Prezident İlham Əliyev bildirib ki, Azərbaycanın təşəbbüsü və iştirakı ilə reallaşdırılan beynəlxalq enerji layihələri regionda sabitliyə, əməkdaşlığa və qarşılıqlı etimada xidmət edir. Enerji sahəsində qurulan bu əməkdaşlıq formatı Azərbaycanı etibarlı tərəfdaş kimi tanıdaraq onun beynəlxalq nüfuzunu daha da gücləndirir.
Müsahibədə qeyd olunduğu kimi, Azərbaycan Avropanın enerji təhlükəsizliyinin təmin olunmasında mühüm rol oynayan ölkələrdən biridir. Müasir enerji nəqli infrastrukturu, uzunmüddətli müqavilələr və qarşılıqlı etimada əsaslanan əməkdaşlıq Avropa ölkələrinin Azərbaycan qazına olan marağını artırır. Bu isə ölkəmizin enerji sahəsində strateji əhəmiyyətini daha da yüksəldir.
Prezident İlham Əliyev vurğulayıb ki, Azərbaycanın enerji siyasəti yalnız iqtisadi maraqlara deyil, eyni zamanda regional sabitliyə və beynəlxalq tərəfdaşlığa xidmət edir. Bu yanaşma ölkəmizin uzunmüddətli inkişaf strategiyasının əsas tərkib hissəsidir.
Prezident İlham Əliyevin Davosda “Euronews” televiziyasına verdiyi müsahibə bir daha təsdiqləyir ki, Azərbaycan Cənubi Qafqazın enerji ehtiyatlarına malik və neft-qaz ixracı həyata keçirən yeganə ölkə kimi regionun enerji xəritəsində mühüm yer tutur. Güclü siyasi iradə, düşünülmüş strategiya və beynəlxalq əməkdaşlıq nəticəsində Azərbaycan bu gün etibarlı enerji tərəfdaşı və regional lider kimi çıxış edir.

YAP Şirvan şəhər təşkilatının məsləhətçisi
İsrayılov Amil Faiq oğlu