Azərbaycan – Cənubi Qafqazın enerji dayağı və qlobal tərəfdaş

Müasir beynəlxalq münasibətlər sistemində Azərbaycanın mövqeyi ardıcıl, praqmatik və milli maraqlara əsaslanan xarici siyasət kursu ilə səciyyələnir. Prezident İlham Əliyevin rəhbərliyi ilə həyata keçirilən bu siyasət ölkəmizin regional və qlobal miqyasda etibarlı tərəfdaş kimi tanınmasını təmin etmişdir. Azərbaycan beynəlxalq hüquqa hörmət, qarşılıqlı fayda və bərabərhüquqlu əməkdaşlıq prinsiplərinə əsaslanaraq, müxtəlif siyasi və iqtisadi mərkəzlərlə balanslı münasibətlər qurmuşdur.
Bu siyasətin mühüm istiqamətlərindən biri Azərbaycanın qlobal iqtisadi platformalarda fəal iştirakı və öz mövqeyini beynəlxalq ictimaiyyətə birbaşa çatdırmaq imkanlarından səmərəli istifadə etməsidir. Dünya İqtisadi Forumunun Davos toplantıları məhz bu baxımdan xüsusi əhəmiyyət daşıyır. Davos forumu dünya iqtisadiyyatının, enerji təhlükəsizliyinin, geosiyasi çağırışların və gələcək inkişaf trendlərinin müzakirə edildiyi nüfuzlu beynəlxalq platforma olmaqla yanaşı, ölkələr üçün öz baxışlarını qlobal auditoriyaya təqdim etmək imkanı yaradır.
Azərbaycan Prezidentinin Davos forumunda mütəmadi iştirakı ölkəmizin qlobal gündəmdə artan rolunun göstəricisidir. 20 yanvar 2026-cı il tarixində Davosda “Euronews” televiziya kanalına verdiyi müsahibə də bu baxımdan xüsusi diqqət çəkir. Müsahibə zamanı Prezident İlham Əliyev Azərbaycanın enerji siyasəti, regional rolu və beynəlxalq tərəfdaşlıq imkanları ilə bağlı mühüm mesajlar vermişdir. Dövlət başçısı müsahibəsində xüsusi vurğulamışdır ki, Azərbaycan bu gün Cənubi Qafqaz regionunda enerji ehtiyatlarına malik olan və bu ehtiyatları dünya bazarlarına ixrac edən yeganə ölkədir. Bu fakt təkcə iqtisadi göstərici deyil, eyni zamanda ölkəmizin regiondakı strateji əhəmiyyətini müəyyən edən əsas amillərdən biridir. Azərbaycan neft və qaz resurslarını beynəlxalq bazarlara çıxarmaqla regionun enerji xəritəsini formalaşdırmış, Cənubi Qafqazı qlobal enerji təhlükəsizliyinin ayrılmaz hissəsinə çevirmişdir.
Prezident İlham Əliyev müsahibəsində Azərbaycanın enerji sahəsində etibarlı tərəfdaş imicinin formalaşmasına xüsusi diqqət çəkmişdir. Onun vurğuladığı kimi, Azərbaycan bütün tərəfdaşları qarşısında götürdüyü öhdəlikləri vaxtında və tam şəkildə yerinə yetirir. Bu etibarlılıq prinsipi ölkəmizə beynəlxalq miqyasda yüksək etimad qazandırmış, uzunmüddətli əməkdaşlıq əlaqələrinin qurulmasına zəmin yaratmışdır. Məhz bu səbəbdən Azərbaycan bu gün Avropanın enerji təhlükəsizliyində mühüm rol oynayan ölkələrdən biri kimi qəbul olunur.
Dövlət başçısı Bakı–Tbilisi–Ceyhan neft kəməri, Cənub Qaz Dəhlizi kimi iri transmilli enerji layihələrinin əhəmiyyətini də xüsusi qeyd etmişdir. Bu layihələr təkcə enerji daşıyıcılarının nəqlini təmin etmir, eyni zamanda region ölkələri arasında əməkdaşlığı gücləndirir, siyasi və iqtisadi sabitliyə töhfə verir. Azərbaycanın təşəbbüsü və fəal iştirakı ilə reallaşdırılan bu layihələr ölkəmizin strateji baxışının və uzunmüddətli planlaşdırma qabiliyyətinin nəticəsidir.
Müsahibədə diqqət çəkən mühüm məqamlardan biri də Azərbaycanın enerji siyasətinin gələcəyə yönəlik olmasıdır. Prezident İlham Əliyev qeyd etmişdir ki, Azərbaycan yalnız ənənəvi neft və qaz ehtiyatlarına əsaslanmır, eyni zamanda yaşıl enerji sahəsində də böyük potensiala malikdir. Günəş və külək enerjisi üzrə həyata keçirilən layihələr ölkəmizin enerji balansının şaxələndirilməsinə, iqlim dəyişiklikləri ilə mübarizə istiqamətində qlobal təşəbbüslərə töhfə verməsinə xidmət edir. Bu yanaşma Azərbaycanın enerji keçidi dövründə də etibarlı tərəfdaş kimi mövqeyini gücləndirir.
Prezident İlham Əliyev müsahibəsində Azərbaycanın enerji siyasətinin siyasi təzyiq aləti olmadığını da xüsusi vurğulamışdır. Ölkəmiz enerji resurslarını qarşılıqlı fayda və əməkdaşlıq prinsipləri əsasında təqdim edir, heç bir ölkəyə qarşı yönəlmiş siyasət yürütmür. Bu prinsipial mövqe Azərbaycanın beynəlxalq nüfuzunu artıran əsas amillərdən biridir və tərəfdaş ölkələr tərəfindən yüksək qiymətləndirilir.
Ümumilikdə, Davosda “Euronews” televiziyasına verilən müsahibə Prezident İlham Əliyevin qlobal enerji gündəliyinə dair baxışlarını, Azərbaycanın strateji mövqeyini və beynəlxalq əməkdaşlığa verdiyi önəmi aydın şəkildə ortaya qoymuşdur. Bu müsahibə bir daha təsdiqlədi ki, Azərbaycan bu gün Cənubi Qafqazın enerji mərkəzi olmaqla yanaşı, daha geniş coğrafiyada enerji təhlükəsizliyinə töhfə verən, etibarlı və məsuliyyətli tərəfdaşdır. Prezident İlham Əliyevin uzaqgörən və ardıcıl siyasəti nəticəsində Azərbaycan beynəlxalq enerji xəritəsində öz mövqeyini daha da möhkəmləndirir, həm iqtisadi gücünü, həm də siyasi nüfuzunu artırır. Bu isə ölkəmizin davamlı inkişafının və qlobal miqyasda artan rolunun əsas təminatçısı kimi çıxış edir.

    Vasif Hümbətov, 
    Salyan Regional Qaz İstismarı İdarəsinin rəis müavini, YAP fəalı