Yaşıl enerjiyə doğru inamlı addım: “Xızı-Abşeron” Külək Elektrik Stansiyası

Prezident İlham Əliyevin Bakıda “Xızı-Abşeron” Külək Elektrik Stansiyasının rəsmi açılış mərasimindəki çıxışı bir daha sübut etdi ki, Azərbaycan enerji təhlükəsizliyini yalnız bugünün deyil, gələcək nəsillərin maraqları prizmasından dəyərləndirən, çevik və uzaqgörən siyasət həyata keçirir. Bu mühüm tədbir təkcə yeni enerji obyektinin istifadəyə verilməsi deyil, eyni zamanda ölkəmizin bərpa olunan enerji strategiyasının real nəticələrlə möhkəmləndiyini göstərən tarixi hadisədir.

Prezident İlham Əliyev çıxışında vurğuladı ki, “Bu gün ölkəmizin müxtəlif yerlərində bərpaolunan enerji növləri inkişaf edir. Növbəti böyük stansiyaların açılışı Biləsuvarda, Neftçalada, Naxçıvanda, işğaldan azad edilmiş ərazilərdə nəzərdə tutulur”. Bu baxımdan qeyd etmək lazımdır  ki, “Xızı-Abşeron” Külək Elektrik Stansiyası Azərbaycanın yaşıl enerji gündəliyində mühüm yer tutur. Bu layihə, bir tərəfdən, ölkəmizin enerji balansında alternativ və təmiz mənbələrin payını artırır, digər tərəfdən isə Azərbaycanın qlobal iqlim çağırışlarına məsuliyyətli yanaşmasının bariz nümunəsidir. Dövlət başçısının qeyd etdiyi kimi, bərpa olunan enerji layihələri Azərbaycanın enerji siyasətində prioritet istiqamətə çevrilib və bu istiqamətdə atılan addımlar sistemli xarakter daşıyır.

Azərbaycan bu gün artıq təkcə ənənəvi enerji mənbələri ilə deyil, eyni zamanda “yaşıl enerji” potensialı ilə də regional lider mövqeyini möhkəmləndirir. Xüsusilə Abşeron və Xızı zonalarının külək enerjisi imkanlarının səmərəli şəkildə reallaşdırılması ölkəmizin təbii resurslardan səmərəli istifadəyə verdiyi önəmin göstəricisidir. Bu stansiyanın fəaliyyəti nəticəsində minlərlə ton karbon emissiyasının qarşısının alınması ekoloji dayanıqlılıq baxımından mühüm nailiyyətdir.

Prezident İlham Əliyevin çıxışında diqqət çəkən əsas məqamlardan biri də beynəlxalq əməkdaşlıq və investisiya mühitinə verilən önəm oldu. Xarici tərəfdaşlarla həyata keçirilən bu layihə bir daha təsdiqləyir ki, Azərbaycan etibarlı tərəfdaş, sabit və proqnozlaşdırılan ölkə kimi beynəlxalq enerji bazarında nüfuzunu artırır. Bu isə yalnız enerji sektorunun deyil, ümumilikdə milli iqtisadiyyatın şaxələndirilməsinə xidmət edir.

Eyni zamanda, “Xızı-Abşeron” Külək Elektrik Stansiyası Azərbaycanın dayanıqlı inkişaf strategiyasının mühüm tərkib hissəsidir. Bu layihə onu deməyə əsas verir ki, ölkə rəhbərliyi enerji ixracatçısı statusunu möhkəmləndirməklə yanaşı, daxili enerji təminatında bərpa olunan mənbələrin payının əhəmiyyətli dərəcədə artırılmasını strateji hədf kimi müəytənləşdirib. Bu yanaşma enerji təhlükəsizliyinin möhkəmləndirilməsi  baxımından xüsusi əhəmiyyət daşıyır.

Nəticə etibarilə, Prezident İlham Əliyevin “Xızı-Abşeron” Külək Elektrik Stansiyasının açılışındakı çıxışı Azərbaycanın enerji siyasətinin ardıcıl, milli maraqlara söykənən və qlobal trendlərlə uzlaşan xətt üzrə inkişaf etdiyini bir daha təsdiqlədi. Bu gün Azərbaycan yaşıl enerjiyə keçidi yalnız niyyət və bəyanatlarla deyil, konkret layihələr və ölçülə bilən nəticələrlə reallaşdırır ki, bu da ölkəmizin dayanıqlı inkişaf strategiyasının uğurla icra olunduğunun ən aydın göstəricisidir.

Milli Məclisin Deputatı Tamam Cəfərov