Millət Vəkili Ülviyyə Həmzəyeva Tanınmış Rəssamı doğum günü münasibətilə təbrik edib

01 yanvar tarixində Naxçıvan rəssamlıq məktəbinin görkəmli nümayəndəsi, Qazaxstan SSR Kirov rayonunun, Taldı Kurqan vilayətində dünyaya göz açmış Tapdıq Hüseyn oğlu Həmzəyevin 70 illik yubileyidir!

Xalqımızın milli-mənəvi dəyərlərinin ayrılmaz hissəsi olan dəmir üzərində döymə sənəti azda olsa bu gün də yaşadılır. Bu sənətin müasir dövr nümayəndələrindən biri də Babək rayonunun Şəkərabad kənd sakini, Azərbaycan Rəssamlar İttifaqının, Naxçıvan Rəssamlar Birliyinin üzvü, müharibə veteranı Tapdıq Həmzəyevdir. 
Onun sənətlə bağlı heç bir titulu yoxdur. O xalqının rəssamıdır və sözün əsl mənasında sənətkardır. Ən sözə baxmayan metal belə Tapdıq müəllimin əlinin altında əriyir və müəyyən formaya düşür.
O, bu gün də evinin bir otağını emalatxanaya çevirərək burada özünəməxsus sənətini yaşadır.

Tapdıq Həmzəyev represiyalarla dolu, çox çətin uşaqlıq keçirib. O,  uşaqlıqdan rəssamlıqla maraqlansa da, sonralar daha çox bədii metal sənətinə üstünlük verib. Əzim Əzimzadə adına Bakı Rəssamlıq məktəbinə qəbul olunsa da, ailəsini çətin vəziyyətdən çıxarmaq üçün işləməyə məcbur olur.
Rəssam, 1974-cü ildə Bakı şəhərində peşə məktəbinə daxil olaraq gələcəkdə seçdiyi, bədii metal sənətin sirlərinə burada yiyələnir. O, uzun illər Sumqayıt şəhərində yaşayır və yaradır. Bu gün də onun dostları və müəllimləri ilə.əlaqəsi var. Bu İllər ərzində də müxtəlif sərgilərdə iştirak edib və özünəməxsus əl işləri sayəsində tanınıb.
Ürəyi sənətlə döyünsə də, Vətəninə xidmət etmək peşəsini seçir və hərbçi olur. Burada da, fərqlənərəq bir çox şücaətlər göstərir. Ulu Öndər Heydər Əliyevlə görüşərək xususi tapşırıqlar alır və sözün əsl mənasında canından keçərək həmin, dövləti tapşırıqları yerinə yetirir.
Tapdıq Həmzəyev hərbi Hava Qüvvələrinin tərkibində Helikopter Alayının-Eskadriliyanın komandiri olur. Hərbi xidmət dövründə də fərqləndiyinə görə bir çox təltiflər alıb.
Təqaüdə çıxandan sonra, yenidən sənətinə qayıdır.
2012-ci ildən başlayaraq, Beynəlxalq səviyyəli və Respublikada keçrilən bütün sərgilərdə iştirak edir.
2023-cü ildə Naxçıvan Rəssamlar Birliyinin  B.Kəngərli adına Sərgi Salonunda Ümummilli Lider Heydər Əliyevin 100 illik yubileyinə həsr olunmuş fərdi yaradıcılıq sərgisini təqdim edir. Sərgidə nümayiş olunan “Ulu Öndər Heydər Əliyevin portreti-baralyefi” və digər, “Üçlük”, “Adəm və Həvva”, “Buğa”, “Ana və uşaq”, “Ümid”, "Çətin uşaqlıq" və digər əsərləri böyük maraqla qarşılanır.

Bu gün Tapdıq Həmzəyev öz zəhməti ilə qədim sənətimizi yaşatmaqla yanaşı, əzmi və sənətə olan bağlılığı ilə gənc nəslə də örnək olur. Onun əl işlərində xalqımızın zəngin tarixinin, milli ruhunun və yaradıcı düşüncəsinin izləri aydın görünməkdədir.

Sənətkarın bu gün də amalı, metal döymə sənətini tanıtmaq, milli-mədəni irsimizə sahib çıxmaq və gələcək nəsillərə ötürməkdir.

Ustadı 70 illik yubileyi münasibətilə ürəkdən təbrik edir, cansağlığı və yaradıcılıq uğurları arzulayıram!