“Azərbaycan və Qazaxıstan arasında münasibətlər uğurla inkişaf edir”. 

Bu sözləri Ana Vətən Partiyasının sədr müavini, Milli Məclisin deputatı Günay Ağamalı “Cebheinfo.az”-a açıqlamasında deyib.

O bildirib ki, rəsmi Bakı və Astana bütün sahələrdə sıx əməkdaşlıq mühiti formalaşdırıb:

“Hər iki ölkə liderinin düşünülmüş strateji yanaşmaları və qarşılıqlı səfərləri əlaqələrimizin daha da dərinləşməsinə zəmin yaradır. Bu mənada, cənab Prezident İlham Əliyevin Astanada mətbuata verdiyi bəyanat və Azərbaycan-Qazaxıstan Ali Dövlətlərarası Şuranın ikinci iclasında çıxışı iki qardaş ölkə arasında olan sarsılmaz bağların ifadəsi idi. 

Qazaxıstanın sürətlə inkişaf etdiyini diqqətə çatdıran ölkə rəhbərimizin qazanılan uğurlarda Prezident Kasım-Jomart Tokayevin rolunu xüsusi olaraq diqqətə çatdırdı. O qeyd etdi ki, bu gün Qazaxıstan bütün dünyada etibarlı tərəfdaşdır, milli maraqları çərçivəsində öz siyasətini həyata keçirən, öz kursu ilə irəliləyən dövlət kimi həm də hər şeydən əvvəl yaxşı dostdur. 

Azərbaycana gəldikdə, xalqımız, ölkəmiz üçün ən ağır dövrlərdə biz həmişə qardaş dəstəyini hiss etmişik, hər zaman bunu görmüşük. İşğal dövründə Qazaxıstan bütün beynəlxalq platformalarda, Azərbaycanın bütün beynəlxalq təşəbbüsləri çərçivəsində həmişə bizi dəstəkləyib, bizimlə həmrəyliyə səs verib və Ermənistan-Azərbaycan münaqişəsinin beynəlxalq hüquq və ədalət prinsiplərinə uyğun nizamlanmasına kömək edib. Dövlət başçısının sözləri Azərbaycan Qazaxıstan əlaqələrinin dostluq, qardaşlıq və qarşılıqlı hörmət prinsipləri üzərində qurulduğunun göstəricidir”. 

Millət vəkili qeyd edib ki, hər iki tərəfin təkcə tarixi köklərlə deyil, eyni zamanda müasir dövrün çağırışlarına birgə cavab vermək iradəsini də nümayiş etdirmələri təsadüfi deyil:

“Bu, müasir beynəlxalq münasibətlər sistemində olduqca əhəmiyyətli bir məqamdır. Avqustun 8-də Amerika Birləşmiş Ştatlarının Prezidenti Donald Trampın moderatorluğu ilə Vaşinqtonda keçirilən üçtərəfli görüşdən və əldə olunan tarixi razılaşmalardan danışan cənab Prezident İlham Əliyev qardaş Qazaxıstanın sülh istiqamətində irəli sürülən təşəbbüsləri dəstəkləməsindən məmnunluğunu ifadə etdi. 

O bildirdi: “Mənim Kasım-Jomart Kemeleviç ilə telefon danışığım olub, ona əldə edilən razılaşmaların bütün detalları haqqında məlumat vermişəm və bir daha Azərbaycana qardaş münasibətinin şahidi olmuşam”. Bununla yanaşı, Prezident İlham Əliyev çıxışı zamanı enerji, nəqliyyat-logistika, iqtisadi və humanitar sahələrdə əməkdaşlığın perspektivlərinə xüsusi diqqət çəkdi. Azərbaycan və Qazaxıstan Orta Dəhlizin inkişaf etdirilməsində maraqlıdır”.

Deputat diqqətə çatdırıb ki, artıq sözügedən istiqamət üzrə yük daşımalarında əhəmiyyətli artım müşahidə edilməkdədir:

“Bu isə hər iki tərəfə Asiya və Avropa arasında körpü rolunu oynamaq imkanı yaradır. Təbii ki, yaxın müddətdə açılacaq Zəngəzur dəhlizi ilə nəqliyyat-logistika imkanları daha da genişlənəcək və şaxələnəcək. Nəticə etibarilə, cənab Prezident İlham Əliyevin Qazaxıstan səfəri münasibətlərimizin yeni müstəviyə keçidinin təsdiqi, onun səsləndirdiyi fikirlər isə qardaşlıq və strateji tərəfdaşlıq ruhunun parlaq ifadəsi idi”.