Azərbaycan ilə Qazaxıstan arasında münasibətlər bu gün strateji tərəfdaşlıq və dərin etimad üzərində qurulmuş, çoxşaxəli əməkdaşlıq nümunəsi kimi fərqlənir. Hər iki dövlət ortaq tarixə, mədəni köklərə və türk birliyinin güclənməsi ideyasına sadiq qalaraq, siyasi, iqtisadi və humanitar sahələrdə qarşılıqlı maraqlara əsaslanan möhkəm əməkdaşlıq əlaqələri formalaşdırıb.
Məhz bu əməkdaşlığın dinamik inkişafı Azərbaycan Respublikasının Prezidenti cənab İlham Əliyevin 18 oktyabr 2025-ci ildə Qazaxıstanın “Kazinform” agentliyinə verdiyi müsahibəsində də ətraflı şəkildə əksini tapıb. Dövlət başçısının müsahibəsi zamanı səsləndirdiyi fikirlər Azərbaycan-Qazaxıstan münasibətlərinin hazırkı mərhələsini və gələcək inkişaf perspektivlərini aydın göstərir. Prezident İlham Əliyev bildirib ki, iki ölkə arasında iqtisadi-ticari əməkdaşlığın spektri son illərdə daha da genişlənib, qarşılıqlı fəaliyyətin davamlı artımı hər iki tərəf üçün mühüm nəticələr doğurur.
Azərbaycan və Qazaxıstan ardıcıl şəkildə birgə təşəbbüslər həyata keçirir, iqtisadiyyatın müxtəlif sektorlarında əməkdaşlığı dərinləşdirir. Bu proses məqsədyönlü dövlət siyasəti, biznes dairələri arasında fəal dialoq və qarşılıqlı etimad mühitinin nəticəsidir. Prezident İlham Əliyevin sözlərinə görə, bu günə qədər Azərbaycanda Qazaxıstan kapitalı ilə 250-yə yaxın kommersiya strukturunun fəaliyyəti qeydə alınıb. Bu fakt ölkəmizin sabit və açıq investisiya mühitinə olan yüksək inamın göstəricisidir və iqtisadi əməkdaşlığın daha da genişlənməsi üçün möhkəm zəmin yaradır.
Ticarət dövriyyəsində də əhəmiyyətli artım müşahidə olunur. 2024-cü ildə iki ölkə arasında əmtəə dövriyyəsinin həcmi 470 milyon ABŞ dolları təşkil edib. 2025-ci ilin ilk səkkiz ayında isə bu göstərici ötən ilin eyni dövrü ilə müqayisədə üç dəfə çox – 547 milyon dollara çatıb. Prezident İlham Əliyevin vurğuladığı kimi, bu artım Orta Dəhlizin imkanlarından səmərəli istifadə, nəqliyyat və logistika infrastrukturunun müasirləşdirilməsi ilə birbaşa bağlıdır.
Azərbaycan ilə Qazaxıstan arasında investisiya əməkdaşlığı da yüksələn xətt üzrə inkişaf edir. Hazırda Azərbaycanın Qazaxıstan iqtisadiyyatına yatırdığı investisiyalar 225 milyon dollara, Qazaxıstanın isə Azərbaycana sərmayəsi 136 milyon dollara çatıb. Bu göstəricilər iki ölkənin uzunmüddətli iqtisadi tərəfdaşlığa və qarşılıqlı inkişaf hədəflərinə sadiqliyini nümayiş etdirir.
Eyni zamanda, nəqliyyat-logistika sahəsində əməkdaşlıq regional iqtisadi inteqrasiyanın və yeni ticarət marşrutlarının inkişafında strateji əhəmiyyət kəsb edir. Prezident İlham Əliyevin vurğuladığı kimi, bu istiqamətdə Orta Dəhliz mühüm rol oynayır və onun səmərəli fəaliyyəti həm Azərbaycan, həm də Qazaxıstan üçün yeni iqtisadi imkanlar açır. 2024-cü ildə iki ölkə arasında tranzit daşımalarının həcmi əvvəlki dövrlə müqayisədə 20 faiz artaraq 3,5 milyon tondan çox olub.
Bu əməkdaşlığın dərinləşməsinə xidmət edən mühüm sənədlərdən biri 2022-ci ildə Aktauda Türkiyə, Azərbaycan və Qazaxıstan arasında imzalanmış “2022–2027-ci illər üçün Orta Dəhlizin inkişafı və istismarı üzrə Yol Xəritəsi”dir. Sənədin məqsədi nəqliyyat-logistika infrastrukturunun sinxron inkişafı, əməliyyatların optimallaşdırılması və vahid tarif siyasətinin həyata keçirilməsidir. Bununla yanaşı, Qazaxıstan ilə Azərbaycan arasında Xəzər dənizinin dibi ilə sualtı fiber-optik rabitə xəttinin çəkilməsi layihəsi də regional rəqəmsal inteqrasiyanın yeni mərhələsinə təkan verəcək. 2025-ci ilin martında Bakıda imzalanmış bu müqaviləyə əsasən, layihənin 2026-cı ilin sonunadək tamamlanması planlaşdırılır.
Prezident İlham Əliyevin “Kazinform”a müsahibəsində vurğuladığı kimi, bu gün Azərbaycan-Qazaxıstan münasibətləri qarşılıqlı etimad, strateji baxış və qardaşlıq prinsipləri üzərində qurulub. Dövlət başçısının fikirləri bir daha göstərir ki, iki ölkə arasında iqtisadi tərəfdaşlıq sadəcə ticarət və sərmayə münasibətləri ilə məhdudlaşmır, əksinə, regionda sabitlik, dayanıqlı inkişaf və ortaq gələcəyə yönəlmiş genişmiqyaslı strateji əməkdaşlıq modelinə çevrilib.

Anar Hacıyev,
YAP Salyan rayon təşkilatının fəalı