“Bu gün, 20 oktyabr – Azərbaycan tarixinin şanlı səhifələrindən biri, Zəngilan şəhərinin düşmən işğalından azad olunduğu gündür”. 

Bu sözləri Ana Vətən Partiyasının sədr müavini, Milli Məclisin deputatı Günay Ağamalı “Cebheinfo.az”-a açıqlamasında deyib. 

O bildirib ki, Zəngilanın coğrafi mövqeyi, İran və Ermənistanla sərhəd kəsişməsində yerləşməsi onun strateji əhəmiyyətini daha da artırır: 

“Məhz bu səbəbdən Azərbaycan Ordusunun bu istiqamətdə həyata keçirdiyi əməliyyat həm hərbi, həm siyasi, həm də diplomatik baxımdan xüsusi əhəmiyyət daşıyırdı. Ali Baş Komandanımızın rəhbərliyi ilə Silahlı Qüvvələrimiz yüksək peşəkarlıq, dəmir iradə və misilsiz cəsarət nümayiş etdirərək əməliyyatı qısa müddətdə və minimum itkilərlə uğurla tamamladı. Qəhrəman hərbçilərimiz ildırım sürətli hücumla İranla 132 kilometrlik dövlət sərhədimizi bərpa etdilər. Bu, Azərbaycanın suverenliyinin tam bərqərar olmasının, milli sərhədlərimizin bütövlüyünün təmin edilməsinin mühüm mərhələsi idi”. 

Millət vəkili qeyd edib ki, Zəngilanın azad edilməsi hərbi uğurla yanaşı, eyni zamanda düşmən üzərində psixoloji üstünlüyün qazanılması, ermənilərin üçüncü dövlətlərin dəstəyinə arxalanmaq ümidinin puça çıxarılması baxımından da tarixi dönüş nöqtəsi oldu: 

“İşğaldan əvvəl özünün zəngin flora və faunası, saf təbiəti və füsunkar mənzərələri ilə seçilən Zəngilan Ermənistanın işğalı dövründə vandalizmə, ekoloji soyqırıma məruz qaldı. Erməni işğalçıları təkcə insanlara yox, həm də təbiətə, torpağa, suya, ağaclara düşmən kəsildilər. Lakin bu gün, dövlət başçımız, Müzəffər Ali Baş Komandan cənab İlham Əliyevin rəhbərliyi ilə Zəngilan dirçəlir, yenidən həyata qovuşur. Zəngilan indi “Ağıllı kənd”, “Ağıllı şəhər” konsepsiyası ilə bərpa olunur. Burada müasir infrastruktur, innovativ texnologiyalar, ekoloji dayanıqlı kənd təsərrüfatı və yeni sosial mühit formalaşır”. 

Günay Ağamalı vurğulayıb ki, qısa zamanda bu bölgə müasir Azərbaycanın inkişaf simvoluna çevriləcək: 

“Şəhər ərazisindən keçəcək qlobal əhəmiyyətli “Orta Dəhliz” Zəngilanı nəinki Azərbaycanın, həm də bütövlükdə regionun iqtisadi və nəqliyyat mərkəzinə çevirəcək. Bu, həm ölkəmizin beynəlxalq nüfuzunu, həm də bölgənin iqtisadi potensialını yeni mərhələyə yüksəldəcək. 

Zəngilanın işğaldan azad olunması cənab Prezident İlham Əliyev, xalq və ordu birliyinin təntənəsi, Azərbaycan dövlətinin gücünün və milli iradəsinin təcəssümü idi. Bu gün Zəngilan yenidən nəfəs alır, yenidən yaşayır. Zəngilanın azadlığı  bütövləşən Azərbaycanın gücü və gələcəyi deməkdir. Günün mübarək, Zəngilan!”