"Prezident İlham Əliyevin ABŞ Prezidenti Donald Trampın və Misir Prezidenti Əbdülfəttah əs-Sisinin dəvəti ilə Yaxın Şərq Sülh Sammitində iştirakı regiondakı böhranın aradan qaldırılması istiqamətində mühüm əhəmiyyət daşıyır. Bu, Azərbaycanın beynəlxalq aləmdə artan nüfuzunun və dövlət başçımızın qlobal miqyasda sülh, təhlükəsizlik və əməkdaşlıq məsələlərində etibarlı və güclü lider kimi qəbul edilməsinin təsdiqidir".

Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədr müavini Günay Ağamalı Azərbaycan Prezidenti İlham Əliyevin Misirin Şarm əl-Şeyx şəhərində keçirilən Yaxın Şərq Sülh Sammitində iştirakından danışarkən bildirdi.

Siyasətçinin sözlərinə görə, Donald Trampın İlham Əliyevi “güclü lider” adlandırması təsadüfi deyil:

"Bu gün dünya miqyasında ölkə başçımız öz qətiyyətli siyasi iradəsi, prinsipial mövqeyi, dövlətçilik fəlsəfəsi və müstəqil siyasəti ilə fərqlənən, sözün əsl mənasında nümunəvi liderdir. Onun rəhbərliyi ilə Azərbaycan yalnız öz ərazi bütövlüyünü bərpa etməklə kifayətlənmədi, eyni zamanda bölgədə sülhün, sabitliyin və dayanıqlı inkişafın təminatçısına çevrildi".

Millət vəkili qeyd etdi ki, Azərbaycan dünyaya ədalətə, beynəlxalq hüquqa və qarşılıqlı hörmətə əsaslanan yeni sülh modeli təqdim edir.

"Dövlət başçımızın Misirə səfəri və Yaxın Şərq Sülh Sammitində iştirakı da məhz bu siyasətin davamıdır. Müharibədən qalib çıxmış bir dövlətin lideri kimi dövlət rəhbərimizin bu sammitdə iştirakı dünyaya çox mühüm mesaj verir. Sülh güc və ədalət üzərində qurulduqda davamlı ola bilər. Azərbaycanın sülh siyasəti region üçün və qlobal miqyasda nümunə kimi qəbul olunur. Prezidentin həyata keçirdiyi diplomatik təşəbbüslər, beynəlxalq platformalarda səsləndirdiyi çağırışlar və ədalətə əsaslanan çıxışlar bir daha göstərir ki, Azərbaycan hadisələrin iştirakçısı olmaqla yanaşı eyni zamanda təşəbbüskarı və formalaşdırıcısı rolundadır.

Misirdə keçirilən Yaxın Şərq Sülh Sammiti çərçivəsində İlham Əliyevin iştirakı Azərbaycanın regional nüfuzunu möhkəmləndirir, ölkəmizin sülhsevər siyasətinin beynəlxalq miqyasda qəbul olunduğunu sübut edir və Azərbaycanın beynəlxalq güclər tərəfindən etibarlı tərəfdaş kimi qəbul edilməsinin göstəricisidir. Prezident İlham Əliyev təkcə Azərbaycanın deyil, bütün regionun gələcək inkişafına istiqamət verən liderdir. Onun uzaqgörən siyasəti sayəsində Azərbaycan ədalətli sülhün, inkişafın və beynəlxalq əməkdaşlığın mərkəzinə çevrilib", - deyə Günay Ağamalı vurğuladı.