"Türk Dövlətləri Təşkilatının Zirvə Toplantısının yenidən Azərbaycanda keçirilməsi böyük tarixi və strateji hadisədir. Bu, bir tərəfdən ölkəmizin artan nüfuzunun, digər tərəfdən isə türk dünyasının inteqrasiyasında Azərbaycanın mərkəzi rolunun göstəricisidir. Zirvə görüşü ortaq mədəniyyətimizin, kimliyimizin, tarixi bağlarımızın möhkəmlənməsi üçün mühüm platformadır".
Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədr müavini Günay Ağamalı Türk Dövlətləri Təşkilatının Zirvə Toplantısının yenidən Azərbaycanda keçirilməsindən danışarkən bildirdi.
O vurğuladı ki, Türk Dövlətləri Təşkilatı əsrlər boyu ortaq tarix, mədəniyyət və dəyərlər üzərində formalaşan təbii birlikdir:
"Son illərdə ortaq əlifba məsələsi gündəmə gətirildiyi kimi, gələcəkdə ortaq türk dilinin formalaşması da real perspektivdir. Bu, mərhələli şəkildə, ilk növbədə təhsil, media və mədəniyyət sahələrində koordinasiya ilə həyata keçirilə bilər. Əslində, artıq bu istiqamətdə mühüm addımlar atılıb, türkdilli xalqlar arasında qarşılıqlı anlaşma gündən-günə güclənməkdədir. TDT çərçivəsində inteqrasiya prosesi getdikcə dərinləşəcək, siyasi və iqtisadi gücümüzün artmasına və ümumtürk birliyinin daha da möhkəmlənməsinə xidmət edəcək".
Deputat əlavə etdi ki, ortaq dil ideyası mədəni birlik, qlobal arenada türk dünyasının daha güclü səsə çevrilməsi deməkdir:
"Azərbaycan hər zaman türk dünyasının həmrəyliyi, ortaq idealların reallaşması üçün qətiyyətlə çalışıb və bundan sonra da çalışacaq. Türk birliyi gücləndikcə, hər bir üzv dövlətin təhlükəsizliyi, inkişafı və beynəlxalq mövqeyi də güclənəcək".
