Azərbaycanın Qlobal Sülh və Ədalət Çağırışı

2025-ci il sentyabrın 25-də Azərbaycan Respublikasının Prezidenti İlham Əliyev Birləşmiş Millətlər Təşkilatının Baş Assambleyasının 80-ci sessiyasında çıxış edərək ölkəmizin beynəlxalq müstəvidə mövqelərini, regionda yaratdığı yeni reallıqları və gələcək baxışlarını dünya ictimaiyyətinə çatdırdı. Bu çıxış, həmçinin Azərbaycanın beynəlxalq təşkilatlarda artan nüfuzunun, qlobal gündəliyin formalaşmasında fəal iştirakının bariz nümunəsi kimi dəyərləndirildi. Dövlət başçısının nitqi həm ölkəmizin son illərdəki inkişaf yolunu əks etdirdi, həm də gələcək hədəflərin aydın təsvirini verdi.
Prezident İlham Əliyev çıxışının əvvəlində Azərbaycanın son illərdə əldə etdiyi nailiyyətlərdən danışaraq qeyd etdi ki, ölkəmiz bu gün dünya miqyasında etibarlı tərəfdaş, sülhün və sabitliyin təşəbbüskarı kimi tanınır. O vurğuladı ki, Azərbaycanın həyata keçirdiyi sosial-iqtisadi islahatlar, enerji və nəqliyyat sahəsində qlobal əhəmiyyətli layihələr ölkəmizi regionun lider dövlətinə çevirib. Dövlət başçısı əlavə etdi ki, bu gün Azərbaycan beynəlxalq münasibətlərdə balanslı siyasət apararaq, müxtəlif qitələrdəki ölkələrlə əməkdaşlıq edir və bu əməkdaşlıq qarşılıqlı etimad üzərində qurulur.
Çıxışında Prezidentin diqqət çəkdiyi əsas məqamlardan biri regional əməkdaşlıq oldu. İlham Əliyev bildirdi ki, regional bağlantılar davamlı sülh istiqamətində baxışlarımızın təməlini təşkil edir. Azərbaycanın təşəbbüskarı olduğu enerji, nəqliyyat və logistika layihələri təkcə ölkəmizə deyil, bütün regiona fayda verir və Cənubi Qafqazı yeni əməkdaşlıq formatlarının mərkəzinə çevirir. Prezident qeyd etdi ki, ölkəmizin həyata keçirdiyi Orta Dəhliz layihəsi Asiya ilə Avropa arasında ən qısa və etibarlı körpü rolunu oynayır, Cənub Qaz Dəhlizi isə enerji təhlükəsizliyinin təmin olunmasında qlobal əhəmiyyət daşıyır. Bu layihələr həm də Azərbaycanın beynəlxalq sülhə və inkişaf proseslərinə verdiyi töhfələrin göstəricisidir.
Dövlət başçısı həmçinin ABŞ Prezidenti Donald Trampın “Azadlığa Dəstək Aktı”na əlavə olunmuş 907-ci düzəlişin icrasını dayandırmaq barədə qəbul etdiyi qərarı xüsusi vurğuladı. O, 1992-ci ildə qəbul edilmiş bu düzəlişi Azərbaycana qarşı ədalətsiz addım adlandıraraq qeyd etdi ki, bu müddəa Ermənistanın işğalçılıq siyasətinə göz yumur, Azərbaycanın haqlı mövqeyinə isə zərbə vururdu. Prezident İlham Əliyev bildirdi ki, ABŞ rəhbərliyinin bu müddəanın icrasını dayandırması tarixi qərardır və bu addım yalnız Azərbaycan üçün deyil, bütövlükdə region üçün sülh və əməkdaşlıq perspektivlərinin genişlənməsi baxımından əhəmiyyətlidir. Bu qərar həm də göstərdi ki, uzun illərdir davam edən ədalətsizliklər gec-tez öz həllini tapır.
Prezident İlham Əliyev çıxışında Azərbaycanın ən böyük nailiyyətlərindən biri kimi 2020-ci ildə 44 günlük Vətən müharibəsində əldə edilən Qələbəni xatırlatdı. O bildirdi ki, Azərbaycan xalqı və dövləti 30 ilə yaxın işğala son qoydu, BMT Təhlükəsizlik Şurasının qətnamələrini icra edərək suverenliyini bərpa etdi. Dövlət başçısı vurğuladı ki, bu Qələbə təkcə Azərbaycanın deyil, həm də beynəlxalq hüququn qələbəsidir. O əlavə etdi ki, Azərbaycan öz gücü ilə ədaləti bərpa etdi və bu, bütün dünyaya bir daha göstərdi ki, beynəlxalq hüquqa əsaslanan prinsiplər heç vaxt unudulmamalıdır.
Qələbədən dərhal sonra azad edilmiş ərazilərdə genişmiqyaslı yenidənqurma proqramının həyata keçirilməsinə başlandığı qeyd edildi. Hazırda həmin ərazilərdə müasir şəhərlər və kəndlər salınır, “ağıllı şəhər” və “ağıllı kənd” konsepsiyası əsasında infrastruktur bərpa olunur, insanlar doğma yurdlarına qayıdırlar. Prezident İlham Əliyev bunun xalqımızın ən qürurlu anlarından biri olduğunu diqqətə çatdırdı və əlavə etdi ki, Azərbaycan dövlətinin əsas məqsədi bu torpaqlarda həyatın bərpası, yeni inkişaf modelinin qurulmasıdır. Bu proqramın həm miqyası, həm də sürəti göstərir ki, Azərbaycan təkcə ərazilərini azad etməklə kifayətlənməyib, həm də orada dayanıqlı inkişaf üçün yeni reallıq formalaşdırır.
Dövlət başçısı Ermənistanın işğal dövründə ərazilərimizə yerləşdirdiyi mina təhlükəsinin hələ də davam etdiyini də xüsusilə vurğuladı. O bildirdi ki, bu təhlükə mülki əhali üçün real təhdid yaradır və bərpa-quruculuq işlərinin tempini ləngidir. Azərbaycan dünyanın ən çox mina ilə çirklənmiş ölkələrindən biridir və bu fakt beynəlxalq ictimaiyyətin diqqətindən kənarda qalmamalıdır. Prezident bəyan etdi ki, minatəmizləmə prosesi təkcə Azərbaycanın deyil, bütün beynəlxalq ictimaiyyətin qarşısında duran humanitar məsələdir və dünya ölkələrinin bu məsələdə həmrəylik göstərməsi vacibdir.
Prezident İlham Əliyev çıxışının sonunda qeyd etdi ki, Azərbaycanın son illərdə əldə etdiyi nailiyyətlər yalnız milli uğur deyil, həm də beynəlxalq hüququn aliliyinin təntənəsidir. O vurğuladı ki, Azərbaycanın yaratdığı yeni reallıqlar bir daha göstərdi ki, heç bir işğal və ədalətsizlik əbədi ola bilməz, gec-tez ədalət bərpa olunur və beynəlxalq hüquq üstün mövqe qazanır. Dövlət başçısının bu mesajı BMT tribunasından bütün dünya ölkələrinə ünvanlanmış mühüm çağırış idi: sülh, əməkdaşlıq və ədalət bəşəri dəyərlərin qorunması üçün əsas şərtlərdir.
Azərbaycan Prezidentinin BMT Baş Assambleyasındakı nitqi bir daha nümayiş etdirdi ki, ölkəmiz qlobal proseslərin etibarlı iştirakçısı, beynəlxalq hüququn və ədalətin qətiyyətli müdafiəçisidir. Bu çıxış Azərbaycanın dünyada artan nüfuzunun, diplomatik çevikliyin və müstəqil siyasətin təntənəsi kimi tarixə düşdü.

Vəfa Məmmədova,  
MİHİ Salyan Rayon Komitəsinin sədri, YAP fəalı