"Şəhidlər bizim milli kimliyimizin, müstəqilliyimizin və azadlığımızın rəmzidir. Onların xatirəsinə qarşı edilən təhqir bütün bəşəri dəyərlərə olunan hörmətsizlikdir. Bu cür davranış Azərbaycan xalqının milli hissləri ilə açıq şəkildə oynamaq deməkdir".
Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədr müavini Günay Ağamalı əcnəbilərin Şəhidlər Xiyabanında qeyri-etik hərəkətlərindən danışarkən bildirdi.
"Şəhidlərimizin müqəddəs ruhuna hörmətsizlik edənlər qanun qarşısında cavab verəcəklər. Dövlətimizin müvafiq orqanları bu məsələni artıq nəzarətə götürüblər. Qanunvericiliyə uyğun şəkildə günahkar şəxslər məsuliyyətə cəlb olunublar.
Şəhidlər bizim qürur mənbəyimizdir. Onların xatirəsinə toxunmaq bütün Azərbaycan xalqına toxunmaq deməkdir".
Deputat vurğuladı ki, bu cür rəzil hərəkətləri qətiyyətlə pisləyir və dövlətimizin, xalqımızın birliyi ilə belə hörmətsizliklərə layiqli cavab verilir.
