Azərbaycan və Gürcüstan arasında uğurlu əməkdaşlıq

Azərbaycanın xarici siyasətində qonşu ölkələrlə əlaqələrin gücləndirilməsi mühüm yer tutur. Respublikamız regionda əməkdaşlığın möhkəmlənməsinə böyük səylər göstərir. Bu ardıcıl və məqsədyönlü siyasətin məntiqi nəticəsidir ki, hazırda Azərbaycan Ermənistan istisna olmaqla, bütün region dövlətləri ilə yüksək səviyyəli xoş münasibətlərə malikdir. Azərbaycanın müstəqillik tarixində sıx partnyorluq və strateji tərəfdaşlıq münasibətləri qurduğu qonşu dövlətlərdən biri də Gürcüstandır. Gürcüstan Prezidenti Mixeil Kavelaşvilinin Azərbaycana rəsmi səfəri əlaqələrin daha da inkişafı baxımından böyük önəm daşıyır. 
Azərbaycan və Gürcüstan uzun illərdir uğurlu əməkdaşlıq modeli yaradıb. Bu təcrübə regional əməkdaşlığın əhəmiyyətini bir daha təsdiqləyir. Gürcüstan Prezidenti Mixeil Kavelaşvilinin ilk xarici səfərini ölkəmizə etməsi bu mənada təsadüfi sayılmamalıdır. Rəsmi Bakı bunu əlaqələrimizin mahiyyətinin, xalqlarımızın dostluğunun göstəricisi kimi dəyərləndirir. Yüksək səviyyəli təmaslar siyasi dialoqun inkişafını göstərir. 
Mətbuata birgə bəyanat zamanı Prezident İlham Əliyev bir daha bəyan etdi ki, Gürcüstan və Azərbaycan birgə bir çox önəmli layihələri icra ediblər və bu layihələr həm ölkələrimiz, xalqlarımız, həm də daha geniş coğrafiya üçün böyük önəm daşıyır. Bakı və Tbilisi beynəlxalq təşkilatlarda da daim bir-birini dəstəkləyir. Bu illər ərzində icra olunan uğurlu layihələr yalnız regionu deyil, daha geniş coğrafiyanı əhatə edir. Azərbaycan Prezidentinin qeyd etdiyi kimi, “birgə həyata keçirilən neft-qaz, nəqliyyat və kommunikasiya layihələri nəinki Cənubi Qafqazın, Avrasiya regionunun nəqliyyat və enerji xəritəsini yenidən tərtib edən layihələrdir”. 
Yəni, artıq elə bir reallıq yaranıb ki, biz bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil. Təsadüfi deyil ki, Gürcüstan daxil olmaqla Azərbaycan 12 ölkəyə təbii qaz ixrac edir və bu ixrac Gürcüstan vasitəsilə həyata keçirilir. Eyni zamanda mürəkkəb geosiyasi vəziyyətdə ən cəlbedici marşrut olan Orta Dəhliz Cənubi Qafqazda məhz Azərbaycandan və Gürcüstandan keçir. Amma aprelin əvvəlində Səmərqənddə keçirilən Avropa İttifaqı-Mərkəzi Asiya sammitində Gürcüstanın Orta Dəhlizdə iştirakı gözardı edildi. Bu məsələyə Prezident İlham Əliyev ADA-da keçirilən beynəlxalq forumda münasibət bildirdi və İttifaqın bu yanaşmasını “ədalətsiz” adlandırdı. Heç bir potensialı olmayan, regionda destruktiv bənd olan Ermənistanı əhəmiyyətli faktor kimi qabartmaq, Gürcüstanı isə görməzdən gəlmək, sadəcə, riyakarlıqdır və təbii ki, bu qərəzli yanaşmanın kökündə Avropa İttifaqının Gürcüstanı alət kimi istifadə etmə cəhdinin boşa çıxması dayanır. Görünən budur ki, Avropa İttifaqı Cənubi Qafqazda müstəqil siyasət yeridən dövlətlərin yox, forpostların, alətlərin yaranmasında maraqlıdır. Elə regionda dayanıqlı sülhün bərpasına mane olmaq cəhdi də bu məkrli planın tərkib hissəsidir.
Bakı və Tbilisi həm də bu coğrafiyada sülhün, əmin-amanlığın bərqərar edilməsində maraqlıdır. Liderlərin verdiyi bəyanatlardan aydın oldu ki, hər iki ölkə bundan sonra da əlaqələrin yüksələn xətlə inkişafına çalışır. Prezident Mixeil Kavelaşvili də öz növbəsində bəyan etdi ki, ölkələrimiz arasında yüksək səviyyəli əlaqələr etimada əsaslanır. Çağırışlar və təhlükələrlə dolu bugünkü qloballaşma dövründə hər iki qonşu ölkə milli dəyərlərin qorunması uğrunda mübarizədə bir yerdədir.
Tərəflər bir-birinin suverenliyini və ərazi bütövlüyünü qətiyyətlə dəstəklədiyini bir daha bəyan etdi. Həm Gürcüstan, həm də Azərbaycan güclü və firavan Cənubi Qafqaz naminə səylərin birləşdirilməsində maraqlıdır. Kavelaşvili də Bakıda “heç bir üçüncü ölkə və ya təşkilatın xalqlarımız üçün nəyin yaxşı olduğunu bizdən yaxşı bilməsi mümkün deyil” söyləməklə regionda dağıdıcı siyasət yeridən dairələrə mesaj ünvanladı. O, eyni zamanda, Azərbaycanın ölkəsi ilə ümumi maraqların müdafiəsi sahəsində intensivləşən əməkdaşlığın vacibliyinə də diqqət çəkdi. Tbilisi düzgün və ardıcıl siyasətlə regionun potensialından tam istifadə etməyi, dünyanın geosiyasi xəritəsində güclü, etibarlı, birləşdirici körpü funksiyasını yerinə yetirməyi vacib sayır. Beləliklə, səfər zamanı aparılan müzakirələrdən, səslənən bəyanatlardan aydın olur ki, sülhə, əməkdaşlığa, rifaha əsaslanan Azərbaycan və Gürcüstan arasında münasibətlər yeni mərhələyə qədəm qoyur.
İki ölkə arasındakı siyasi dialoqun yüksək dinamizminə uyğun olaraq tərəflərin maraqlarına cavab verən iqtisadi əlaqələr də yüksələn xətlə inkişaf edir. Azərbaycan şirkətləri dost ölkədəki əlverişli investisiya mühitindən bəhrələnərək tikinti, turizm, infrastruktur quruculuğu və digər sahələrə məmnuniyyətlə böyük həcmlərdə sərmayələr yönəldirlər. Bütövlükdə, Azərbaycan-Gürcüstan əlaqələri yüksələn xətlə inkişaf edir. Bu amil, dövlətlərimizin və xalqlarımızın maraqlarına tamamilə cavab verir.

Rəşad Tağızadə, 
Salyan rayon Ərəbqardaşbəyli kənd tam orta məktəbin direktoru, YAP fəalı