Türkiyə-Azərbaycan qardaşlığı regionda sülhün və təhlükəsizliyin qarantıdır - RƏY

Azərbaycan-Türkiyə münasibətləri Ulu Öndər Heydər Əliyev tərəfindən səsləndirilən "Bir millət, iki dövlət" kəlamı əsasında bütün dünyaya örnək olan qardaşlıq ruhunu özündə əks etdirir. Bu gün rəsmi Bakı ilə Ankara arasında əlaqələr bütün sahələrdə dinamik inkişaf edir və intibah dövrünü yaşayır. Həmin inkişafda qədim tarix və dərin köklərlə yanaşı, ölkə liderlərinin səmimi qardaşlıq münasibətləri də əsas amillərdən biri kimi qeyd olunmalıdır.

Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.

Deputat bildirib ki, Prezident İlham Əliyev ilə Prezident Rəcəb Tayyib Ərdoğan arasındakı əlaqələrin yüksək statusu dövlətlərimizin regional və beynəlxalq müstəvidə maraqlarının vahid platformada həyata keçirilməsini şərtləndirir.

"Türkiyə-Azərbaycan qardaşlığı regionda sülhün və təhlükəsizliyin qarantıdır. Məhz bu səbəbdən Prezident İlham Əliyevin qardaş Türkiyəyə işgüzar səfəri olduqca əhəmiyyətli hadisə kimi yadda qaldı. Çünki artıq qlobal nizam dəyişir və yeni çağırışlarla qarşı-qarşıyayıq. Sevindirici hal ondan ibarətdir ki, rəsmi Bakı və Ankara yeni dünya düzənində siyasi, iqtisadi və hərbi güc olaraq önə çıxır, Türk Dövlətləri Təşkilatı kimi güc mərkəzi formalaşdırır",- deyə G. Ağamalı vurğulayıb.

O əlavə edib ki, Azərbaycan-Türkiyə qardaşlığı vahid Türk dünyasının birliyini və əməkdaşlığını da stimullaşdırır.

Əgər İkinci Qarabağ müharibəsinədək Azərbaycan və Türkiyənin münasibətləri əsasən Cənubi Qafqazda söz sahibi olmaq perspektivləri ilə məhdudlaşırdısa, hazırda bu əməkdaşlıq regionda sabitlik yaratmaq missiyasını da əks etdirir. Bununla yanaşı, nəqliyyat-logistika potensialımız Avropa ilə Asiya arasındakı dəhlizlərin perspektivini artırır.

“Bu gün müşahidə etdiyimiz hadisələri onu deməyə əsas verir ki, Azərbaycan-Türkiyə əməkdaşlığı gələcəkdə daha da inkişaf edəcək və Türk dünyasının güclənməsinə töhfələr verəcəkdir”, - deyə G.Ağamalı vurğulayıb.