Azərbaycan-Somali əməkdaşlığı yeni mərhələdə

Azərbaycanın dünyanın geosiyasi müstəvisində artan rolu xarici ölkələrlə əlaqələrin güclənməsinə təkan verir. Bunun nəticəsidir ki, son illər ölkəmizlə münasibətləri inkişaf etdirmək istəyən dövlətlərin sayı artıb. Xüsusilə də, müxtəlif Afrika ölkələri Azərbaycanla münasibətləri inkişaf etidirirlər. Belə ölkələrdən biri də Somali respublikasıdır. Somali Federativ Respublikasının Prezidenti Hasan Şeyx Mahmudun fevralın 11-də Azərbaycana rəsmi səfəri ölkələrimiz arasında münasibətlərdə yeni mərhələnin başlanğıcı oldu. İslam Əməkdaşlıq Təşkilatının və Qoşulmama Hərəkatının üzvü olan bu Afrika ölkəsi Azərbaycanla qarşılıqlı hörmətə, dəstəyə və həmrəyliyə əsaslanan mühüm əməkdaşlıq əlaqələrinə malikdir. Somali daim Azərbaycanın ərazi bütövlüyünü dəstəkləyib və beynəlxalq təşkilatlarda ölkəmizə dəstək verib. 
Qeyd etmək lazımdır ki, Azərbaycanın Afrika ölkələrilə münasibətlərinin daha da inkişaf etməsinə səbəb Bakının uğurla Qoşulmama Hərəkatına sədrlik etməsi oldu. Azərbaycanın Qoşulmama Hərəkatına dörd illik sədrliyi bu təşkilatın nüfuzunu daha da yüksəklərə qaldırdı. Bu, eyni zamanda, Azərbaycana yeni əməkdaşlıq sahələrini inkişaf etdirmək və gücləndirmək imkanı verdi. Bu istiqamətlərdən biri də Afrika qitəsidir. Heç kimə sirr deyil ki, Azərbaycan bu mühüm geosiyasi platformada üçüncü dünya ölkələrinə öz hüquqlarını reallaşdırmaqda dəstək verir. Beynəlxalq münasibətlərdə ədalətli yanaşmaları hər zaman müdafiə edən Azərbaycan “Qara qitə” ölkələrinin haqq səsinin aktiv müdafiəçisidir. Məhz Azərbaycan neokolonializmin çirkin simasını bütün dünyaya nümayiş etdirir və bu bəlaya qarşı mübarizənin önündə gedir.
Bu gün Azərbaycanın Afrikada mövqeyi COP29 iqlim sammitindən sonra daha da güclənib. Bakı sammitində Afrika ölkələrinə iqlim problemlərini dünya ictimaiyyətinə çatdırmaq üçün imkan tanındı, meydan verildi. Azərbaycan Prezidenti inkişaf etmiş dövlətlərə çağırış edərək Afrikadakı ölkələrin iqlim problemlərinin həllinə dəstək vermələrinin vacibliyinə toxundu. Cənab İlham Əliyevin həm COP29 sammitində, həm də digər beynəlxalq tədbirlərdə Afrika ölkələrinə dəstək çıxışları bu gün öz müsbət nəticəsini verməkdədir. Azərbaycanın digər ölkələrlə olduğu kimi Afrika dövlətləri  ilə  də münasibətləri bərabərhüquqlu tərəfdaşlıq prinsiplərinə əsaslanır. 
Qeyd edək ki, Prezident Hasan Şeyx Mahmudun ölkəmizə səfəri çərçivəsində hər iki ölkə arasında bir sıra sənədlər - “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Somali Federativ Respublikasının Prezidentinin Ofisi arasında dövlət xidmətlərinin göstərilməsi sahəsində əməkdaşlığa dair Anlaşma Memorandumu”, "Azərbaycan Respublikasının Energetika Nazirliyi ilə Somali Federativ Respublikasının Energetika və Su Ehtiyatları Nazirliyi arasında yaşıl enerji sahəsində əməkdaşlıq haqqında Anlaşma Memorandumu", “Azərbaycan Respublikasının Elm və Təhsil Nazirliyi ilə Somali Federativ Respublikasının Təhsil, Mədəniyyət və Ali Təhsil Nazirliyi arasında təhsil sahəsində əməkdaşlıq haqqında Saziş”, “Azərbaycan Respublikası Hökuməti ilə Somali Federativ Respublikası Hökuməti arasında müdafiə və müdafiə sənayesi sahələrində əməkdaşlıq haqqında Saziş” imzalanıb. 
Prezident İlham Əliyev və həmkarı Hasan Şeyx Mahmud mətbuata bəyanatlarla çıxış ediblər. Azərbaycan lideri bəyanatında Somali ilə təhsil, müdafiə sənayesi, kənd təsərrüfatı, sərmayə, dövlət xidmətləri sahələrində əməkdaşlıq edəcəklərinə dair məsələləri müzakirə apardıqlarını vurğulayıb: “Biz BMT, İslam Əməkdaşlıq Təşkilatı və digər beynəlxalq qurumlarda bir-birimizə dəstəyi birmənalı olaraq davam etdirəcəyik. Çünki hər iki ölkə üçün arxalanacağımız tərəfdaşlara və dostlara malik olmaq çox vacibdir”.
Hasan Şeyx Mahmud səfərin sadəcə diplomatik əməkdaşlıq olmadığını bildirərək deyib: “Bu, həqiqətən, iki qardaş ölkələrimiz arasında tərəfdaşlıq üzrə səmərəli və strateji müttəfiqliyin başlanğıcı deməkdir. Somali və Azərbaycanın inkişaf, təhlükəsizlik və tərəqqi ilə bağlı baxışları üst-üstə düşür. Bu gün biz əsasən tərəflər arasında daha sıx əməkdaşlığın dərinləşdirilməsinə sadiqliyimizi bildirdik”.
Bir sözlə, Somali ilə əməkdaşlıq etməklə Azərbaycan Afrika ölkələri bazarları ilə əməkdaşlığı da genişləndirmək imkanı əldə edir.

Elçin Kazımov,
YAP Salyan rayon təşkilatının gənc YAP fəalı