Uğurlu diplomatiya və yüksək beynəlxalq nüfuz

    Bu gün Azərbaycan yüksək sosial-iqtisadi inkişafa nail olmaqla qlobal dünyanın müasir və qüdrətli dövlətinə çevirib. Əldə etdiyimiz bütün uğurların təməlində ümummilli liderimiz Heydər Əliyevin siyasi uzaqgörənliyi,  müdrikliyi və  Prezident İlham Əliyevin uğurlu diplomatiyası dayanır. Ölkəmizdə həyata keçirilən sosial-iqtisadi islahatlar, aparılan çoxtərəfli və balanslaşdırılmış xarici siyasət nəticəsində Azərbaycan yüksək beynəlxalq nüfuza malik olmaqla regionun ən güclü və suveren ölkəsinə çevrilib.  Dövlətimiz bu gün güclü iqtisadiyyata, yenilməz orduya, dünya birliyində yüksək mövqeyə sahib olmaqla yanaşı, faydalı sosial siyasətə malik bir ölkədir. Həyata keçirilən praqmatik strategiya Azərbaycana beynəlxalq münasibətlər sistemində müstəqil xarici siyasət həyata keçirən milli dövlət kimi etibarlı tərəfdaş imici qazandırıb. Uğurlu diplomatiyaya malik olan Azərbaycan Prezidentinin yürütdüyü  xarici siyasət nəticəsində ölkəmizin 155 dövlətin dəstəyi ilə BMT Təhlükəsizlik Şurasına qeyri-daimi üzv seçilməsi, həmçinin 120 dövlətin təmsil olunduğu Qoşulmama Hərəkatına 4 il sədrlik etməsi,  200 ölkənin yekdil qərarı əsasında  80 dövlət və hökumət başçısının, ümumilikdə 196 ölkə üzrə qeydiyyatdan keçmiş 76 mindən çox iştirakçının qatıldığı COP29-a Bakının yüksək səviyyədə ev sahibliyi etməsi Prezident İlham Əliyev diplomatiyasının uğuru, müasir Azərbaycanın qüdrətinin və yüksək beynəlxalq nüfuzunun göstəricisidir. 
      BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) -un Bakıda keçirilməsi yalnız ekoloji deyil, həm də geosiyasi baxımdan mühüm bir hadisə oldu. Bu beynəlxalq, tarixi tədbir Azərbaycanın qlobal diplomatiyada artan rolunu göstərdi və  ulu öndər Heydər Əliyevin “Vaxt gələcək Azərbaycan dünyaya günəş kimi doğacaq” fikrinin reallığa çevrildiyini dünyaya sübut etdi,  ölkəmizə qarşı genişmiqyaslı,  planlaşdırılmış qarayaxma kompaniyası aparanların əsassız iddia və təhdidlərini fiaskoya uğratdı.
       Müstəmləkəçilik siyasəti yürüdən Fransa kimi bəzi Qərb dövlətlərinin və erməni lobbisinin ölkəmizə qarşı məkirli planına baxmayaraq,  qısa müddət ərzində bütün işlər uğurla həyata keçirildi, tədbirlərin yüksək səviyyədə keçirilməsi üçün lazımi infrastruktur yaradıldı və dünyanın diqqət mərkəzində olan  COP29 təhlükəsizlik şəraitində baş tutdu. Bu beynəlxalq tədbir Azərbaycan dövlətinin və xalqının növbəti möhtəşəm nailiyyəti oldu. Qısa müddət ərzində yüksək peşəkarlıq və fədakarlıq göstərməklə bütün hazırlıq işlərini ən yüksək səviyyədə həyata keçirən Azərbaycan dünya birliyinin növbəti dəfə etimadını və inamını doğrultdu. 
   Azərbaycanın prezidentliyi və ev sahibliyi ilə COP29-da bir çox mühüm qərarlar qəbul edildi. Belə ki, Paris Sazişinin 6-cı maddəsi tam şəkildə işlək vəziyyətə gətirildi, İtki və Zərər Fondu tam şəkildə insitutlaşdırıldı, Bakı Adaptasiya Yol Xəritəsi yaradıldı. Bundan əlavə COP29-da qəbul olunan ən önəmli qərarlardan biri də inkişaf etməkdə olan ölkələrə hər il 1,3 trilyon dollar iqlim maliyyəsini yönəltməyi nəzərdə tutan yeni öhdəlik olan Bakı Maliyyə Məqsədi barədə razılığın əldə olunmasıdır.  Bakı Maliyyə Məqsədi, inkişaf etmiş ölkələrin 2035-ci ilə qədər inkişaf etməkdə olan dövlətlər üçün hər il ən azı 300 milyard dollar məbləğində vəsaitin səfərbər olunmasına rəhbərlik etməsini nəzərdə tutan əsas hədəfləri müəyyənləşdirir. COP29 Sədrliyinin əsas prioriteti üzrə əldə olunan bu uğur, əvvəlki 100 milyard dollarlıq iqlim maliyyəsi məqsədindən əhəmiyyətli dərəcədə yüksəkdir və qlobal investisiyaların yeni dalğasını təmin edəcək.
       COP29 sadəcə iqlim dəyişikliyi mövzusunda deyil, həm də Azərbaycanın beynəlxalq səviyyədə öz liderlik qabiliyyətini nümayiş etdirmək yolunda yeni tarixi bir addım oldu. Bakı dünya siyasətinin ən mürəkkəb problemlərin müzakirə olunduğu bir məkana çevrildi. Bu konfrans Azərbaycanın yalnız müşahidəçi deyil, qlobal çağırışlara cavab verən lider olduğunu bütün dünyaya nümayiş etdirdi. Bu gün Azərbaycan təkcə Cənubi Qafqazda deyil, həm də Avropa və Asiyanın enerji təhlükəsizliyində mühüm rol oynayan ölkələrdən biri kimi tanınır və  iqlim böhranı ilə mübarizə aparan ölkələr arasında unikal bir mövqeyə malikdir. Ölkəmiz son illərdə alternativ enerji mənbələrinə keçidi sürətləndirməkdə davam edir.  Belə ki, “Yaşıl dünya naminə həmrəylik ili” kimi təsdiqlənmiş 2024-cü ilin sonuna qədər Azərbaycan enerji istehsalının 30 faizini bərpa olunan mənbələrdən təmin etməyi planlaşdırır.
       Beləliklə, beynəlxalq diplomatiya tarixinə ölkəmizin adını yazdıran COP29 tədbirinin uğurla başa çatması və iqlim dəyişikliyinə qarşı qlobal mübarizədə Azərbaycanın verdiyi töhfə ölkənin beynəlxalq nüfuzunu daha da artırdı. 

Vüqar İsayev
YAP Göygöl rayon təşkilatının sədri