İkitərəfli əlaqələrinin inkişafına böyük töhfə

Prezident İlham Əliyev iyunun 7-də Misir Ərəb Respublikasına rəsmi səfər etmişdir. Səfər çərçicəsində Dövlət başçımızın Misir Ərəb Respublikasının Prezidenti Əbdülfəttah əs-Sisi ilə əvvəlcə təkbətək, sonra geniş tərkibdə görüşü olmuşdur. Azərbaycan-Misir sənədlərinin imzalanması mərasimindən sonra Prezidentlər mətbuata bəyanatlarla çıxış etmişlər.
Prezident İlham Əliyev bu səfərin Misir-Azərbaycan əlaqələrinin inkişafına böyük töhfə verəcəyini bildirib. Ölkə başçısı Prezident əs-Sisini Bakıda keçiriləcək COP29 konfransına dəvət etdiyini və dəvətin qəbul edilmisinə şad olduğunu söyləyib. “Misirin COP27 sədrliyi və ev sahibliyi böyük uğurlarla nəticələndi”-deyən Prezident İlham Əliyev bu münasibətlə həmkarını təbrik edərək ,  Misirin bu sahədəki təcrübəsini öyrənmək üçün müraciət etdiyini  və iki ölkə  nümayəndələrinin daim təmasda olduqlarını diqqətə çatdırıb.
Dövlət başçısı qeyd edib ki, biz beynəlxalq təşkilatlar çərçivəsində fəal çalışırıq, o cümlədən BMT, Qoşulmama Hərəkatı, İslam Əməkdaşlıq Təşkilatı çərçivəsində fəal əməkdaşlıq edir, İslam həmrəyliyinin gücləndirilməsi istiqamətində birgə səylər göstəririk.  Ölkə başçısı əlavə edib ki, Misirin dəstəyi ilə Azərbaycan dörd il ərzində Qoşulmama Hərəkatına sədrlik etmiş, bu sədrliyin nəticəsində Hərəkat daha böyük imkanlara malik olmuşdur.
Prezident İlham Əliyev çıxışında Fələstin-İsrail münasibətlərinə  də toxunub. Dövlətimizin başçısı iki ölkə arasında münasibətlərin  tənzimlənməsi və müstəqil Fələstin Dövlətinin yaradılması Azərbaycanın Qoşulmama Hərəkatına sədrliyi  dövründə hər zaman diqqət mərkəzində olduğunu bildirib. ” Müstəqil Fələstin Dövləti qurulmalıdır, Şərqi Qüds onun paytaxtı olmalıdır. Bu gün Qəzzada yaşanan faciə tezliklə dayandırılmalıdır, müharibə dayandırılmalıdır və bütün məsələlər danışıqlar yolu ilə həll olunmalıdır” - deyə ölkə başçısı vurğulayıb.
Prezident İlham Əliyev  çıxışında həmçinin Azərbaycan keçən ilin sentyabr ayında öz dövlət suverenliyini və ərazi bütövlüyünü tam bərpa etdiyini diqqətə çatdırıb, Azərbaycanın Qazax rayonunun otuz ildən çox müddət ərzində işğal altında olmuş dörd kəndi danışıqlar yolu ilə Azərbaycana geri qaytarılmasından, Ermənistan ilə Azərbaycan arasında münasibətlərin normallaşma prosesinin Misir tərəfindən dəstəklənməsindən, iki ölkə arasındakı ticarət dövriyyəsinin bir neçə dəfə artmasından bəhs edib, yeni nəqliyyat dəhlizləri ilə əlaqədar fikirlərini söyləyib. 
Beləliklə, Prezident İlham Əliyevin Misirə rəsmi səfəri ikitərəfli əlaqələrinin inkişafına böyük töhfə verəcək, eyni zamanda iki ölkə arasındakı münasibətlərin gələcəyi üçün yeni üfüqlər açacaq. 

Sahib Şükürov
YAP Göyçay rayon təşkilatının sədri