Minsk qrupu 28 il ərzində münaqişənin həlli prosesi ilə məşğul olsa da heç bir nəticə əldə edilmədi.

     Dünyanın bir çox nüfuzlu təşkilatlarına üzv olan Azərbaycanla dünyanın inkişaf etmiş ölkələri arasında mövcud əlaqələr gündən-günə inkişaf edir. Azərbaycan regional və qlobal layihələrin reallaşmasında fəal iştirak edir. Təkcə neft deyil, TAP və TANAP kimi qaz xətlərinin işə düşməsi ilə Avropanın enerji təhlükəsizliyi xəritəsi tamamilə dəyişmiş oldu. Azərbaycanın Parlamentlərarası İttifaqla əlaqələri də dinamik şəkildə inkişafdadır. Azərbaycan Respublikasının Prezidenti cənab İlham Əliyevin cari ilin 1 fevral tarixində Parlamentlərarası İttifaqın Baş katibi Martin Çunqonqu qəbul etməsi bütün bu əlaqələrin müasir dövrdə davamlığına əsaslanır. 
     Dövlətimizin başçısı Minsk qrupunun 28 il ərzində münaqişənin həlli prosesi ilə məşğul olsa da heç bir nəticə əldə edilmədiyini, sülh yolu ilə Azərbaycan torpaqlarının işğaldan azad olunmadığını diqqətə çatdıraraq bildirdi ki, Azərbaycan torpaqlarının işğaldan azad olunması və məcburi köçkünlərin geri qayıtmasının təmin edilməsi üçün Minsk qrupu tərəfindən Ermənistana heç bir təzyiq göstərilmədi və müvafiq sanksiyalar tətbiq olunmadı. Azərbaycan tərəfi isə torpaqları işğal altında olan zaman haqlı şəkildə Minsk qrupunun üzv dövlətlərini Ermənistana təzyiq göstərmək, ona müvafiq sanksiyalar tətbiq etmək barədə təkliflər irəli sürdüyü halda, o vaxt Minsk qrupu tərəfindən bu istiqamətdə heç bir addım atılmadı. Vətən müharibəsindən əvvəl Dağlıq Qarabağ münaqişəsinin həlli ilə məşğul olan Minsk qrupu kimi təşkilatın məsələyə laqeyd yanaşması, ikili standartlara istinad etməsi faktı da məsələnin müharibə yolu ilə Azərbaycan tərəfindən həll edilməsini qaçılmaz etdi. Minsk qrupunun uzun illər ərzində əməli fəaliyyətsizliyinə Azərbaycan dövləti özü son qoyaraq 30 il ərzində işğal olunmuş əzəli və tarixi torpaqlarını Müzəffər ordusu tərəfindən azad etdi.
     Azərbaycan gələcəkdə mümkün revanş üçün İrəvanda heç bir boşluq buraxmaq niyyətində deyil. Biz bilirik ki, istər Ermənistanda, istərsə də xarici dairələrdə bir sıra revanşist qüvvələr var və onlar hər zaman ölkəmizə qarşı bu iddiada olacaqlar.   Bunun  qarşısının alınmasında əsas məsələlərdən biri də  məhz  qanunvericiliyin dəyişməsidir. Əks halda heç bir razılaşma imzalanmayacaq və Bakıya edilən hər hansı təzyiq İrəvana kömək etməyəcəkdir. Cənab İlham Əliyev sülh yolu ilə nizamlanma ilə bağlı öz mövqeyini həmişə açıq və dürüst ifadə edib və Ermənistan rəhbərliyindən fərqli olaraq heç vaxt həqiqəti öz xalqından və beynəlxalq ictimaiyyətdən gizlətməmişdir. Cənab İlham Əliyevin xarici və daxili siyasətinin uğurunun  əsasında da  ölkənin müstəqilliyi və firavanlığı naminə nəyi və nə vaxt edəcəyini bilən Azərbaycan xalqının öz liderinə tam inamıdır. 
     Ermənistan rəhbərliyinin öz xalqını və beynəlxalq ictimaiyyəti aldatmaq üzrə  cəhdləri iflasa məhkumdur, çünki İrəvan nəhayət başa düşməlidir ki, heç kim Azərbaycanda heç bir qeyri-müəyyən vədlərə və dinc arzulara dair yalan təminatlara inanmır. Əgər Ermənistan rəhbərliyi həqiqətən də sülh və sabitlik istəyirsə, o zaman cənab  İlham Əliyevin təklif etdiyi sülh gündəliyini  qəbul etməli və müxtəlif beynəlxalq platformalarda yalnız iki xalqın mümkün barışığına mane olan, ərazi iddialarından əl çəkən təxribat xarakterli hərəkətləri dərhal dayandırmalı və nəhayət, öz daxili qanunvericiliklərini beynəlxalq hüquqa və BMT Nizamnaməsinə uyğunlaşdırmalıdır.  

Məlakə Məlikova,
Salyan şəhər 5 saylı ümumi orta məktəbin direktoru