Müzəffər Ordumuz Xankəndində qürurla addımlayır

O tarixi günlərdən, qəlbimizin zəfər sevinci ilə coşub daşdığı anlardan 3 il keçir. Üç il ərzində baş verən dəyişikliklər, əlamətdar o günlərin sayı o qədər çox olub ki, Azərbaycan xalqı hələ də Zəfər təəssüratları ilə yaşamaqda davam edir. 30 illik əzablı, məşəqqətli qaçqın, köçkün həyatına son qoyan soydaşlarımız  Qarabağa, Zəngəzura qayıdır, Vətən torpağını öpüb gözlərinə sürtürlər.  

Bu sevinci bizlərə yaşadan Azərbaycan Ordusu, ruhu daim diri olan, cənnətməkan şəhidlərimiz, qazilərimiz, Müzəffər Ali Baş Komandanımız, cənab Prezident İlham Əliev elə bir tarix yazdılar ki, Millət var olduqca bu tarix yaddaşlarda qalacaqdır.

Bu gün Zəfər Günü münasibətilə Xankəndində keçirilən parad öz möhtəşəmliyi ilə bu Zəfərin mahiyyətini bir daha sərgiləmiş oldu. Paradda iştirak və çıxış edən Azərbaycan Respublikasının Prezidenti, Müzəffər Ali baş Komandan İlham Əliyev Azərbaycan Ordusunun qalib əsgərlərini və xalqı salamlayaraq dedi: “Dörd il bundan əvvəl, bax, qarşıdakı Xankəndi şəhər stadionunda Ermənistanın baş naziri çıxış edərkən təkəbbürlə demişdi: “Qarabağ Ermənistandır və nöqtə”. Biz ona, onun kimilərinə və onların arxasında duranlara döyüş meydanında qan tökərək, şəhidlər verərək göstərdik ki, o, səhv yolda idi. Biz göstərdik ki, Qarabağ Azərbaycandır, döyüşərək, vuruşaraq, heç nəyə baxmayaraq və bu gün hər kəs bilməlidir ki, bizimlə bundan sonra heç kim zarafat etməsin. Ermənistan rəhbərliyi əgər revanşist fikirlərlə yaşayırsa, Ermənistanın arxasında dayanan manipulyasiyaya öyrəşmiş ölkələr əgər yenə də Azərbaycan üçün hansısa məkrli plan qurursa, o, bugünkü parada bir nəzər yetirsin. Bilsin ki, burada mindən çox igidimiz düzülübdür və bizim 100 mindən çox onlar kimi igidlərimiz var və heç bir qüvvə bizi təhdid edə bilməz. Biz istənilən müstəvidə döyüşə hazırıq, siyasi, lazım olarsa, hərbi meydanda bunu göstərmişik. XXI əsrdə heç bir ordu bizim qədər peşəkarlıq, fədakarlıq göstərməmişdir. Heç bir xalq öz doğma torpağını bu qədər əziz tutub uğrunda ölümə getməyə hazır olmamışdır. Bunu biz hamımız yaxşı bilirik, bunu dünya da bilsin.”

Cənab Preizden qeyd etdi ki, 30 il bundan əvvəl ordumuzun olmadığı, qüvvələrin qeyri-bərabər olduğu, silahların çatışmadığı dövrdə 15 min şəhid versək də torpaqlar işğal Vətən uğrunda mübarizəni özünün amalına çevirdi: “İyirmi il bundan əvvəl Prezident kimi öz fəaliyyətimə başlayanda əziz xalqıma bildirmişdim ki, biz torpaqlarımızı müharibə yolu ilə azad etməyə hazır olmalıyıq. O vaxt hələ sülh danışıqlarına müəyyən ümidlər var idi. Ancaq illər keçdikcə bu ümidlər tükənirdi. Ermənistan öz xoşu ilə bizim torpaqlarımızdan çıxmaq istəmirdi. Ermənistan-Azərbaycan münaqişəsinin nizamlanması ilə məşğul olmuş vasitəçilər faktiki olaraq vəziyyəti dondurmağa çalışırdılar, hesab edirdilər ki, Azərbaycan xalqı bu vəziyyətlə barışacaq. Ancaq Azərbaycan xalqı heç vaxt bu vəziyyətlə barışmaq fikrində deyildi və mən dəfələrlə bunu müxtəlif kürsülərdən bəyan etmişdim ki, biz bu vəziyyətlə barışmayacağıq. Azərbaycan torpağında ikinci erməni dövlətinin yaradılmasına icazə verməyəcəyik, danışıqlar nəticəsiz başa çatsa, güc tətbiq edərək beynəlxalq hüquq əsasında öz doğma torpaqlarımızı döyüş meydanında işğalçılardan azad edəcəyik. Əgər Ermənistan rəhbərliyi və onun arxasında o vaxt və bu gün duran bəzi xarici qüvvələr mənim sözlərimə qulaq assaydılar, İkinci Qarabağ müharibəsinə ehtiyac qalmazdı. Mən dəfələrlə deyirdim, Ermənistan rəhbərliyinə müraciət edərək deyirdim ki, əgər siz bizim torpağımızdan çıxmasanız, döyüş meydanında bizimlə üz-üzə gələcəksiniz və sizin arxanızda kim istəyirsə dursun, bu, bizi haqq yolumuzdan döndərə bilməz. 44 günlük Vətən müharibəsi bunu bir daha göstərdi.”

Cari ilin sentyabrın 19-da başlayan və tam qələbə ilə nəticələnən antiterror əməliyyatının nəticələrini şərh edən cənab Preizdent həmin əməliyyatın bügünkü paradın məhz Xankəndində keçirilməsinin əsas səbəbi olduğunu qeyd etdi; “O vaxt mən heç şübhə etmirdim ki, gün gələcək və burada - Xankəndi şəhərində Azərbaycan Bayrağı qaldırılacaqdır. 44 günlük müharibənin 10 noyabr 2020-ci il tarixində dayandırılması imkan verdi ki, Ağdam, Kəlbəcər və Laçın rayonları bir güllə atılmadan bizə qaytarıldı. Bu, Ermənistanın imzaladığı kapitulyasiya aktının tərkib hissəsi idi və bizim tələbimiz idi. Ermənistan bu tələbi yerinə yetirməyə məcbur olmuşdu. Çünki döyüş meydanında Azərbaycan Silahlı Qüvvələrinin gücünü və Azərbaycan siyasi rəhbərliyinin siyasi müstəvidə iradəsini görmüşdür. Ağdam, Laçın, Kəlbəcər rayonlarının bir güllə atılmadan azad edilməsi minlərlə gəncimizin həyatını xilas etdi. Biz onsuz da o bölgələri də döyüş meydanında azad edəcəkdik. Ancaq şəhidlərimizin sayı daha çox ola bilərdi.”

Bəli, bu gün babamız Pənahəli xanın əzəmətli yurdunda Azərbaycanın üçrəngli bayrağı dalğalanır. Bu gün Xankəndində müzəffər Azərbaycan ordusu qürurla addımlayır. Bu gün Azərbaycan Qarabağda qurur, yaradır, bu torpağın kimə məxsus olduğunu dünyaya əyani şəkildə göstərir.

Natiq Quluzadə,

YAP Zəngilan rayon təşkilatının sədri