“2025 Azərbaycanın xarici siyasətində tarixi dönüş oldu”

“2025-ci il Azərbaycanın xarici siyasət tarixində mühüm mərhələ kimi dəyərləndirilməlidir. Prezident İlham Əliyevin uzaqgörən, prinsipial və milli maraqlara söykənən siyasəti nəticəsində ölkəmiz beynəlxalq münasibətlər sistemində mövqelərini daha da möhkəmləndirmiş, etibarlı tərəfdaş və regionlararası “canlı körpü” kimi nüfuzunu artırmışdır”.

Deputat bildirib ki, ilk növbədə, Çin Xalq Respublikası ilə hərtərəfli strateji tərəfdaşlığın rəsmiləşdirilməsi xüsusi qeyd olunmalıdır. Bu addım Azərbaycanın qlobal iqtisadi və siyasi proseslərdə rolunu gücləndirməklə yanaşı, Şərq–Qərb əməkdaşlığında ölkəmizin əhəmiyyətini bir daha təsdiqlədi: “Prezidentin Çinə dövlət səfəri zamanı imzalanan Birgə Bəyannamə ölkəmizin çoxşaxəli və balanslaşdırılmış diplomatiyasının bariz nümunəsi olmaqla yanaşı, Azərbaycanın qlobal güclərlə bərabərhüquqlu əməkdaşlıq potensialını nümayiş etdirir.
Bununla yanaşı, Azərbaycanın ədalətə və beynəlxalq hüquqa söykənən müstəqil xarici siyasətinin əsas tərkib hissələri olan müxtəlif dövlətlərlə ikitərəfli və beynəlxalq təşkilatlar daxilində əlaqələrin inkişafında mühüm uğurlara imza atıldı. Azərbaycanın D-8 İqtisadi Əməkdaşlıq Təşkilatına üzv qəbul edilməsi və Mərkəzi Asiya Məşvərət Şurasında tamhüquqlu üzv statusu qazanması ölkəmizin çoxtərəfli diplomatiyada artan nüfuzunun göstəricisidir. Təxminən 30 il ərzində yeni üzv qəbul etməyən D-8 kimi nüfuzlu təşkilata Azərbaycanın dəvət olunması beynəlxalq ictimaiyyətin ölkəmizə göstərdiyi yüksək etimadın ifadəsidir. Prezident İlham Əliyevin qeyd etdiyi kimi, ölkəmiz dərhal bu istiqamətdə fəal işlərə başladı. Bizim təşəbbüsümüzlə Azərbaycanda təşkilatın bir neçə mərkəzi yaradılmışdır. Xarici siyasətlə bağlı digər önəmli nailiyyət Mərkəzi Asiya Məşvərət Şurasına tamhüquqlu üzv seçilməyimizdir. Bu da nadir hadisə sayıla bilər. Çünki coğrafi nöqteyi-nəzərdən Azərbaycan Mərkəzi Asiyada yox, Cənubi Qafqazda yerləşir. Ancaq Mərkəzi Asiya ölkələri ilə həm ikitərəfli, həm də çoxtərəfli formatlarda sıx əlaqələrimiz var və son illər o qədər çox layihələr icra edilir ki, artıq bu ölkələr yekdilliklə bizi tamhüquqlu üzv seçdilər.
2025-ci ildə Azərbaycanın regionlararası əməkdaşlıqda oynadığı rol daha da güclənmişdir. Tranzit həcmlərinin artması, Şərq–Qərb və Şimal–Cənub nəqliyyat dəhlizləri üzrə fəallığın yüksəlməsi, yeni enerji və rəqəmsal layihələrə start verilməsi ölkəmizin yalnız enerji təchizatçısı deyil, eyni zamanda logistik və texnoloji mərkəzə çevrildiyini göstərir. Bu, Prezident İlham Əliyevin balanslaşdırılmış və çoxşaxəli xarici siyasət kursunun məntiqi nəticəsidir.